此文章節錄自<投資者手記>(多謝曹sir)，說中不少香港人心態:

1999年蓋洛普公司進行大規模民意調查，向六十個國家、五萬七千名成年人調查所得，當經濟發展水平很低時，收入上升可帶一定快樂；但人均GDP達三千至五千美元後，快樂效應就開始遞減，反而唔及文化、教育、環保、人權保障、工作及生活方式影響大！即一旦人均收入達三千至五千美元後，生活方式較收入上升帶更多快樂！例如1940至98年，美國人均收入上升四倍，但感到快樂人佔人口總數30％左右，未有變化。1958至88年日本人均收入短期內上升五倍多，但感到快樂人佔人口總數59％，未有上升。

根據研究所得，一旦人均收入達三千至五千美元後，快樂來源有三：一、友誼；二、自由感覺；三、思想。大哲學家維特根斯坦晚年患喉癌，彌留之際告訴世人「我度過多美好的一生」。幸福唔在乎物質佔有而在乎心態！詩仙李白亦係快樂人，佢可以「天子呼來不上船」！佢心明「服侍權貴，並不開顏」道理。

香港人均收入早已超過三千至五千美元水平，即港人快樂好大程度上來自友誼、自由感覺及思想方面解放！你有冇大哲學家思想？我曾過多美好的一生，所以我快樂；或李白情懷：「天子呼來不上船」？物質追求應該適可而止，因快樂往往自物質以外東西，其中最重要係心態。　　近期往往被問及退休問題。例如須幾多錢才可過舒適退休生活？我老曹認為，任何人經過四十年努力工作，都應該擁有舒適退休生活；放下工作，享受閒暇，將煩惱交由下一代去承擔。問題關鍵唔在乎你擁有幾多（當然唔可以一無所有）而係在乎你邊度退休！如果你擁有等同林森池一樣財富，當然可以香港退休，住花園洋房兼勞斯萊斯；反之，選擇內地退休，普通打工仔亦一樣可以住花園洋房，過十分寫意退休生活。

換言之，寫意退休生活唔在乎你擁有幾多，而係在乎你邊處退休。同文張健雄兄選擇到上海退休，一百萬港元已可買層一千二百方呎豪宅，過遊山玩水式退休生活。另一位朋友賣掉香港五百呎住宅單位，收回二百萬元；加上公司退休金幾十萬元，中山使二十多萬元已有花園洋房，其餘二百萬元買債券，月入萬餘元，亦過談談情跳跳舞退休生活。

香港係搵錢地方，但唔係合適退休地方，一旦唔需要返工搵錢，唔少地方極之適宜過退休生活。有位朋友極喜歡雪，退休後搬去哈爾濱居住，當地雪景媲美瑞士，而生活費只係瑞士十分之一！除上述外，亦有人考慮到泰國退休，天天享受泰式按摩（聽講每次只需蚊百港），或峇里島，甚至馬來西亞檳城亦係退休一流地方。

1997年後港人必須學習：一、生在香港唔一定需要香港搵食。二、香港搵食，投資可以環球化。三、點解退休後仍留香港？依家唔係環球化咩？

人所以貧窮，許多時係受思想框框所害，劃地為牢而不自知。去泰國睇睇幾多外國人泰國退休，點解香港人一定要香港退休？唔好同股票談戀愛，唔好同物業談戀愛，我老曹亦希望面對退休人士唔好同香港談戀愛，天大地大冇理由無處容身。